يا مصر فاكرة ..في يوم في شهر في سنة
نزلنا للميادين
نزلنا كتيير كنا بالملايين
كنا عايزين حقك اللي اتاخد منك سنين و سنين
كنا عايزين نردلك كرامتك و نرفعلك الجبين
فصرخنا فقالوا علينا عملاء و خاينين
علينا صرخنا فهاجمونا بس احنا كنا في وشهم صامدين
فصرخنا أكتر فضربونا و كأننا مش بني أدمين
فعرف العالم حقيقتهم و إنهم ملاعين
حبوا يداروا خبيتهم فصقفولنا و قالوا شاطرين
و بجد بجد إحنا أسفين
و اللي فات مات و خلونا في الايام الجايين
فهمنا لعبتهم أصلنا خبرة سنين
و ردنا كان صرخة واحدة "إحنا مش ماشيين"
---
في يوم في شهر في سنة
خلعنا الظالم الكبير
و فرحنا يومها و كان عيد تحرير
و قولنا خلاص من النهاردة هنبتدي التطهير
بس الظلمة عددهم كتير و كتير
حاولوا يقتلوا حلمنا اللي لسه بيشوف النور
فطالبناكي تحاكميهم و تصلحي الأمور
و فضلنا مستنين شهور و شهور
---
في يوم في شهر في سنة
نازلين تاني للميادين
بس المرة دي نازل أطالب بحقي أنا
رغم إن أنا إنتي و إنتي أنا
بس إنتي نسيتيني أنا
أنا الشهيد و الشهيد هو أنا
نسيتي أخويا المجروح و أخويا أنا
نسيتي لما رفعت علمك و مكنش في غيري أنا
نسيتي أم ضحت بابنها فداكي و مكنش ابنها غيري أنا
نسيتيني الف مرة نسيتيني أنا
و محدش ضحي بحياته عشانك غيري أنا
و مستعد أضحي ألف مرة عشانك أيوه أنا
أنا كل شاب و طفل و شيخ أنا شعبك أنا
أنا اللي هفضل أصرخ لحد ما يرجعلي حقي أنا
5-7-2011
ليست هناك تعليقات:
إرسال تعليق